het-arubahuis

Informacion pa tur Arubiano cu intencion di emigra pa Hulanda

Arubahuis ta wordo acerca diariamente pa Arubianonan cu tin pensa di bin biba na Hulanda y tambe esnan cu ta aki caba cu ta enfrenta diferente dificultadnan. Pesey Arubahuis ta sinti e importancia pa informa nos hendenan riba diferente aspectonan cu nan mester tene cuenta cune pa establece nan mes na Hulanda.

Pa cuminsa Hulanda tin un scarsedad grandi di vivienda. Hopi di esnan cu ta biba na Hulanda mester warda añanan pa haya un cas. Door cu Hulanda ta miembro di Comunidad Europeo, e ta mara na condicionnan politico y decisionnan intergubernamental. Esey ta haci cu Hulanda mester a tuma hopi refugiado di Siria, cu e resultado cu pa haya un cas social awendia na Hulanda ta hopi dificil. Pa bin na remarca pa un cas social e persona mester ta bibando minimo dos aña na e municipio. Arubahuis NO tin e autoridad pa yuda cu cas ni tampoco yuda inscribi bou di un adres di cas. Arubahuis su rol ta pa guia, informa y sostene e Arubiano.

Hulanda su  regla primordial pa un emigrante ta pa e inscribi su mes na un municipio y si un persona NO tin un adres pa inscribi na e municipio, e no ta wordo considera como residente di e municipio. Cada persona ta haya un number denomina ‘Burgerservicenummer’ (BSN) pa asina e por ta legalmente inscribi na un municpio. Ta bon pa menciona cu registracion na un municipio NO ta duna garantia cu un persona automaticamente tin derecho riba beneficionnan social manera un uitkering (onderstand).

Hopi Arubiano na prome instante ta busca manera pa biba cerca famia na Hulanda, pero esaki ta te trese cune cu esnan cu ta ricibi un onderstand ta haya nan mes den problema cu e instancia conserni, ya cu esaki ta wordo reduci dependiendo di e cantidad di persona y entrada. Lastimamente esaki ta trese cune cu casi tur biaha e famia ta laga e persona hospeda, pero NO ta laga e persona inscribe su mes na e adres.

Cu e pandemia di Covid, e situacion na Hulanda a bira mas dificil pa Arubianonan cu kier emigra y  vooral Arubianonan cu tin yui, mester ta bon conciente cu e situacion aki por trece problema cu instancianan Hulandes manera Kinderbescherming of Jeugdzorg, na momento cu e instancianan tuma nota cu mayornan no tin entrada pa por sobrevivi.

Pa e motibo aki Arubahuis ta haci un yamada na esnan cu ta dicidi toch di bin Hulanda pa tin un minimo di 10.000 euro pa asina nan por sobrevivi 3 a 4 luna. Hulanda di awe no ta e Hulanda di antes.

Pa cualkier otro informacion por manda un e-mail na Dit e-mailadres wordt beveiligd tegen spambots. JavaScript dient ingeschakeld te zijn om het te bekijken.

Business Event Arubahuis