het-arubahuis

Persberichten

Presentacion di e proyecto “Mi ta Bon”

Den Haag – Na buurthuis De Mussen na Den Haag a tuma lugar un presentacion di e proyectonan “Mi ta Bon”. E encuentro a conta cu presencia di Minister Plenipotenciario sr. Edwin Abath. Diputado di municipio di Den Haag sr. Rabin Baldewsingh a tene un introduccion unda ela splica cu na Den Haag ta biba aldededor di 14 mil Antiano y Arubiano. E Antiano of Arubiano ta wordo considera como cualkier habitante di Den Haag y ta haya tambe un trato igual, segun sr. Baldewsingh. Solamente ariba algun tereno manera enseñansa, desempleo y criminalidad tin un maneho specifico pa Antiano y Arubiano. E diputado a acentua cu un parti grandi di e Antiano y Arubianonan ta bon integra den e comunidad di Den Haag y ta solamente un grupo chiquito ta ocacion problema. Mester bisa cu recientemente a constata cu e parti di mucha muher den e grupo cu ta ocaciona problema ta aumentando y lo mester analisa e origen di e tendencia aki, asina sr. Baldewsingh a sigui bisa.

Minister Plenipotenciario sr. Edwin Abath na su vez a trece dilanti cu e ta contento cu e y su staf por cera conoci cu e diferente proyectonan pa nos hendenan na Den Haag y tambe tende di esnan directamete envolvi y protagonistanan di e desaroyo cu ta tumando lugar ariba e tereno aki. Otro siman lo tin un firmamento di un protocol entre e municipio Den Haag y Aruba unda lo sera un convenio di cooperacion ariba diferente tereno. E enfasis di e cooperacion aki ta sinta ariba estrecha e lasonan di amistad, intercambio di conocemento y cooperacion entre Den Haag y Aruba ariba diferente temanan. Di e manera aki lo por traha hunto entre otro ariba tereno di cuido di mucha, hoben y anciano, deporte y weganan, intercambio cultural y embeyecimento di ciudad.

Despues a sigi presentacion di algun proyectonan manera The Mall, Fundacion Mytikas y MOED. Sr. Jan Oosten di The Mall a splica cu nan meta ta pa e hobennan tin un lugar digno den comunidad. Ta siña e hobennan pa purba na supera nan problemanan, por ehempel na scol, durante stage y den busqueda di un trabao. E fundacion ta traha cu “rolmodels” pa stimula e hobennan. Finalmente sr. Van Oosten a bisa cu nan ta traha a base di guia ariba un termino largo.

Sr. Imro Blom di Fundacion Mytikas a acentua cu nan manera di traha ta atrabes di arte y teatro. Esaki ta un metodo cu tin un drempel hopi abao y tambe ta siña e hobennan traha den team cu otro. Sr. Blom a bisa di ta contento cu su fundacion a keda selecta pa Oranjefonds pa purba na introduci nan metodo na otro partinan na Hulanda.

Sra. Ellen Rosina (di Aruba) di MOED – “Maatwerk Onder Eén Dak” a bisa cu actualmente nan ta duna guia na doscien hoben. Nan forma di guia ta encera bishita tanto na cas como contactonan cu e scolnan. E coachnan t’ey pa scucha ki problema e hobennan ta enfrenta. ‘Nos meta final ta pa tur e hobennan cu ta bou di nos guia termina na scol cu un diploma’, asina sra Rosina a bisa.

E fundacion Kakiña ta traha mas cu e famianan y ta brinda sosten na mayornan den educacion di e muchanan, principalmente na e mamanan hoben, segun splicacion di sra. Joyce van der Linde-Kwidama.

Na final di presentacion Minister Plenipotenciario sr. Edwin Abath a bisa cu e mester constata cu e problematica di hobennan ta mas o menos similar cu na Aruba. E ta di opinion cu e origen di problemanan ta na e islanan mes; hopi di e situacionnan cu e hobennan ta confronta por keda relata na e calidad di formacion y educacion cu nan ta haya na cas. ‘Nos mester siña for di e resultadonan di proyectonan aki. Pesey ta bon pa ‘match’ organisacionnan di tanto Den Haag y Aruba. Pa medio di e cooperacion aki nos por brinda e sosten y guia nesesario na esnan cu mester di guia y asistencia, pa percura cu nan worde poni ariba e caminda di exito, segun sr. Abath.

 

7Mi_ta_Bon-project

Business Event Arubahuis

Bezoek Minister Guillfred Besaril aan FC Twente